TIGIN DINA URUSAN LEULEUTIKAN

CARPON

---

Barang sup ka jero imah, Maya meubeutkeun maneh kana korsi di rohang tamu bari ngarenghap. Rarayna baeud awahing ku keuheul.

“Ku naon, Geulis?” tanya indungna. “Datang-datang bet mani baeud kitu.”

“Kumaha teu keuheul atuh, Mah? Tadi teh, May dipasihan tugas anu henteu penting. Dipiwarang nganteurkeun catetan ka bagian produksi, teras motokopi, dugi ka dipiwarang ngagentos mangsi printer,” ceuk Maya kukulutus, “kapan eta mah padamelan admin, Mah. May teh staf di ieu divisi, sanes admin!”

Ibu Emi ukur imut. Tuluy pokna, “Ngaranna oge pagawe anyar. Wajar meureun dititah-titah kitu kieu mah.”

“Nya henteu atuh, Mah. Eta mah kasebutna ngagawekeun batur!” tempas Maya.

“Geus atuh, ayeuna mah geura mandi terus istirahat heula. Nya cape, nya lapar ongkoh, jadi we ambek-ambekan,” ibu Emi ngaheureuyan.

“Ah ... si Mamah mah,” ceuk Maya bari terus ngaleos ka kamarna.

Jam 18.30 Maya kaluar ti kamar rek nyiapkeun tuang wengi, sakumaha sasarina. Bu Emi jeung pa Soma nungguan di meja makan. Aranjeunna ngobrolkeun sual batur-batur pa Soma di kantor.

“Kumaha ieu si Geulis di kantorna? Ceuk Mamah rada pundung basa uih teh?” pa Soma ngamimitian obrolan jeung Maya.

“Nu mawi, Pah ... piraku Maya dipiwarang ngerjakeun padamelan admin. Kumaha rek teu keuheul atuh, Pah?” Maya mindoan deui nyaritana.

“Hayu, atuh bari tuang, Pah, ceuk bu Emi megat kalimah. “Ieu tos lapar ti sonten teu acan neda.” Kalawan saregep ibu Emi oge nyiukkan sangu keur pa Soma.

“Eh, naha si Kasep teu ngiring tuang, Mah? Ka mana budak teh?” pa Soma nanyakeun anak cikalna.

“Oh ... saurna lembur, Pah. Nuju seueur padamelan di kantor. Ka Mamah mah nyarios bade uih tabuh 7 ti kantor,” tembal ibu Emi. Pa Soma ukur unggeuk.

“Tah, Pah, si Aa mah bener staf. Lembur ngudag target, da memang job desc-na kitu. Teu jiga May,” celengkeung teh Maya nyarita bari masih keneh keuheul.

Indung jeung bapana silih reret bari imut. Tuluy pok pa Soma nyarita, “Geulis, kudu nempo ti lebah sejen atuh. Ayeuna teh kasempetan keur Maya diajar saloba-lobana ti senior-senior di kantor.

“Atos diajar mah,” Maya nempas, “ayeuna mah bagian damel.”

“Keun bae dititah itu ieu oge, da pasti engke oge aya mangpaatna,” ceuk pa Soma mamatahan. “Memang ceuk Maya mah eta pagawean teh teu penting, tapi urang teh kudu satia tina urusan leuleutikan saperti kitu. Percaya geura ka Papah.”

“Enya, May. Baheula oge si Aa ngarasa digawekeun ku senior-na. Eh, ari pek teh ayeuna si Aa nu pangapalna kana pagawean di kantor, paling dipercaya ku dununganana. Tapi aya risikona,” ceuk bu Emi, “si Aa jadi loba gawe, kudu sering lembur. Coba mun baheula si Aa teu sabar, teu satia mah ... wah ... ayeuna teh tacan tangtu dipercaya ku dununganana.”

Maya ukur ngahuleng bari ngalenyepan nasehat sepuhna. Ras manehna inget kana lalampahan lanceukna di kantor.

Memang bener, baheula mah lanceukna teh geus kawas admin, kadang malah siga OB (Office Boy), purah dititah itu ieu. Tapi lanceukna bisa tigin sarta ngabuktikeun ku cara leukeun gawe. Teu kungsi lila, geus naek jabatan.

“Enya nya, Pah, Mah. May kudu diajar tina pangalaman Aa,” Maya ngaku.

“Tah, kitu, Geulis. Tos ah, ulah baeud deui. Mani goreng patut,” ibu Emi ngaheureuyan. Pa Soma ngabarakatak.

***

“Mah, Mah ...!” Maya gogorowokan nyauran ibuna barang asup ka jero imah tina panto hareup.

Ibu Emi rurusuhan kaluar ti dapur terus ka tengah imah rek nyampeurkeun Maya bari rada hariwang. Tuluy pok nanya, “Ku naon, May? Aya naon? Aya nu cilaka?”

“Henteu, Mah!” tembal Maya mani bungah. “Minggu payun May diajakan ngiring pameran ka Jakarta. Pameran di hotel bintang lima, Mah!” Maya mani marahmay, kaciri pisan atoheunana.

“Wah ... hebat euy anak Mamah,” ceuk ibu Emi milu bungah tur reueus.

“Ti pagawe anyar nu tiluan tea ngan May wungkul anu diajakan teh, Mah,” ceuk Maya ngajelaskeun.

“Naha bet bisa kitu nya, May?” tanya bu Emi panasaran.

“Apan kamari teh aya manager wilayah anu datang ka kantor. Terus anjeunna nanyakeun sual produk anu paling payu di bagian May jeung sababaraha produksi-na basa bulan kamari,” Maya ngajelaskeun ka indungna, tapi bari leungeunna henteu lesot tina HP.

“Hmmm ... terus kumaha?” tanya bu Emi anu panasaran kana carita anakna.

“Kabeneran manager May nuju teu aya, aya pancen sejen. Ari anu sanes teu aya nu apal, jadi teu bisa ngajawab, bingung rek ngajelaskeunana,” ceuk Maya, “May teh inget asana mah eta teh tulisan dina catetan anu ku May dianteurkeun ka produksi tea.”

“Ari Maya inget keneh?”

“Kantenan atuh, Mah,” tembal Maya, “jadi we May bisa ngajawab.”

“Naon hubunganana jeung miluan pameran?” tanya bu Emi tacan pati ngarti kana arah caritaan anakna.

“Tah, ... ku sabab kitu, eta manager wilayah teh nyarita ka manager May supaya May bisa mimiti diajak miluan pameran. Puji Gusti nya, Mah,” May nyarita kalawan sumanget tur bungah pisan.

Ibu Emi imut bangun reugreug, tuluy pokna, “Enya, May, eta teh berkah keur Maya, anu geus satia dina urusan leuleutikan.”

“Leres, Mamah sayang ...!” ceuk Maya bari ngarangkul mani pageuh ka ibu Emi.

“Aduh ... eungap atuh, May, Mamah teu bisa napas yeuh!” ceuk ibu Emi. Tapi Maya kalah seuseurian tur beuki pageuh ngarangkul ibuna.

---

Ku: EVA